vir altyd

ek gee vir jou my hart

elke donker hoekie sodat jou lig daarin kan skyn

ek gee vir jou my mond

sodat joune vir ewig daarin kan verdwyn

ek gee vir jou my lyf

sodat jy jou volgende storie woord vir woord daarop kan skryf

ek gee vir jou my lewe, my trane en my lag

my elke oomblik, my dag, my nag.

want jy maak my hele wêreld heel

met jou arms wat my veilig hou

en jou woorde wat in my ore speel

jy laat my weer in liefde glo

jy leer my van voor af droom en hoop

jy is die die klop waarop my hart ritme hou

die spore wat oor my siel loop

en van vandag en totdat tyd ophou

is ek jou meisie, jou vriendin, jou vrou.

om te verlang

aan die einde
is daar altyd iets wat binne ophou asem haal
jou storie op my lyf geskryf
jou mond oor en oor herhaal
en ek soek jou vergeefs
waar jy in die gange van my hart ronddwaal
want dis lankal nie meer jy nie
net my eie onthou:
prentjies van gister
gedagtes van my en jou

en selfs al laat ek jou gaan
en hou op om jou heeltyd te verwag
sal ek nie kan vergeet van jou hande
onthou my ore self jou lag
sal my lyf jou nog verlang
en die seer my hart verteer

miskien more mis ek jou minder
maar vandag mis ek jou meer

jammer

ek wou nog vir jou sê

ek wou nog vir ‘n ruk langs jou sit en met jou praat

miskien selfs aan jou vat

ek wou nog vir jou sê

maar toe ek daar kom was dit te laat

en jy was te vêr af in die pad

vir omdraai en luister

en miskien was ons altwee te kwaad

en te seer van al die weer probeer

en moeg vir die verwyt en die verwoes

en van al die woorde wat die mooi verteer

alles was te gou verby 

en toe word die nagte te lank

en die dae langer

en die oomblik vir ewig verlore

maar ek wou nog vir jou sê

ek's jammer 

in fokus

alles het tot stilstand geruk;
vir 'n oomblik my lewe gevries in tyd
vorentoe is alles onseker
en agter is 'n stille verwyt

hoeveel mag ek droom
en wat is dit wat ek wil hê?
is daar iets wat wegkruip in jou oë
iets wat jou hande vir my wil sê?

of  is dit alles net 'n illusie
iets wat my lyf van êrens af onthou
maar hoekom in al my huidige chaos
voel ek in fokus naby jou

lewe

rook my laaste sigaret in die oggend reën
my mondhoeke met rooiwyn gevlek
ek ruik nog jou lyf, maar ek is weer alleen
niks wat werk nie, maar alles perfek
en ek weet nog steeds nie wat liefde is nie
maar jou oë kyk dwarsdeur my
en ek weet nog steeds nie presies wat dit is wat ek van jou mis nie
maar as jy loop wil ek hê jy moet bly
en ek weet dit is 'n duisend keer verkeerd
maar ek het nodig om vir een laaste keer asem te haal
en hopelik sal ek myself kan vergewe
want ek weet ek gaan in jou waansin verdwaal
en jy gaan vir ewig binne my lewe

weg



alles is skielik leeg
elke ruimte wat jy gevul het
elke herhindering waarin jy beweeg
jy sit vas in my onthou
jou lag; jou hande; jou oë
jou sleepvoet loop
jou blinde glo
ek praat nog met jou
maar ons praat nie met mekaar nie
en ek voel jou êrens naby
maar jy is nie meer daar nie
en miskien eendag as die geraas bedaar
en ons die donker met lig omvou
sal die leegte verdwyn
sal ek jou vir ewig by my kan hou

vir nelis.


hoop

die verlede sal jou wel eendag weer kom haal

dis die prentjies van onhou

wat seker maak jy bly betaal

vir jou foute en jou skel en jou weer geval

en dit maak nie saak hoe ver weg jy loop

die goeie stukkies van jou siel

bly steeds uitverkoop

 

maar daar's 'n plek in my hart waar net jy mag gaan

'n stilword plek  

waar daar nog hoop bestaan

en miskien as die verlede my weer kom haal

sal my siel vir oulaas vir twee betaal